عبدالباری عمری، رئیس اداره برق‌رسانی حکومت طالبان، روز جمعه، ۲۶ ثور، در نشست چهارجانبه‌ای در شهر دوشنبه، پایتخت تاجیکستان، توافق‌نامه‌ای برای تسریع در اجرای پروژه انتقال برق کاسا ۱۰۰۰ امضا کرد.
در این نشست، وزرای انرژی کشورهای تاجیکستان، قزاقستان و پاکستان نیز حضور داشتند. به گفته شرکت برشنا، نهاد مسئول برق‌رسانی افغانستان، با امضای این توافق‌نامه، روند اجرایی بخش‌های باقی‌مانده پروژه کاسا ۱۰۰۰ با سرعت بیشتری دنبال خواهد شد.
پروژه کاسا ۱۰۰۰ بخشی از یک طرح منطقه‌ای برای انتقال انرژی برق از آسیای مرکزی به آسیای جنوبی است و افغانستان مسیر ترانزیتی این انتقال محسوب می‌شود.
این نخستین‌بار است که دولت تاجیکستان به‌صورت رسمی از هیئتی از حکومت طالبان در خاک خود میزبانی می‌کند؛ اقدامی که می‌تواند نشان‌دهنده تغییراتی در سطح تعاملات منطقه‌ای با طالبان باشد.