همزمان با سفر شی جینپینگ، رئیس‌جمهوری چین، به تاجیکستان، سران دو کشور از تشکیل یک حکومت فراگیر در افغانستان با مشارکت همه اقوام و گروه‌ها حمایت کردند.
به گزارش رسانه‌های چینی، پس از ملاقات شی جینپینگ و امامعلی رحمان، رؤسای جمهوری چین و تاجیکستان، در دوشنبه، دو کشور با صدور یک بیانیه مشترک از ایجاد حکومت فراگیر با حضور نمایندگان تمامی گروه‌های قومی، مذهبی و سیاسی در افغانستان حمایت کردند.
بر اساس این بیانیه مشترک، سران دو کشور تأکید کردند که افغانستان مستقل، بی‌طرف، متحد، فراگیر و صلح‌آمیز که عاری از تروریسم، جنگ و مواد مخدر باشد و در صلح و هماهنگی با همسایگان خود زندگی کند، به نفع مردم افغانستان و کشورهای منطقه است.
سران دو کشور چین و تاجیکستان یک روز قبل از ملاقات در دوشنبه، در اجلاس سران سازمان همکاری شانگهای در قزاقستان نیز حضور داشتند.
سران سازمان شانگهای پس از برگزاری اجلاس در آستانه، در بیانیه مشترکی بر تشکیل حکومت فراگیر در افغانستان تأکید کردند.
کشورهای منطقه و جهان، همزمان در تعامل با طالبان، خواسته خود را برای تشکیل دولت فراگیر و رعایت حقوق بشر در افغانستان تکرار کرده‌اند. همچنین، کشورهای همسایه افغانستان بارها بر اهمیت تشکیل حکومت فراگیر و محترم شمردن حقوق تمامی اقوام و گروه‌ها در این کشور تأکید کرده‌اند.
